中原地產創辦人施永青早前提出「放寬安全套品控、容許瑕疵品流通以振興生育率」，一席話點燃全城熱議，亦將大眾目光拉到呢件日常私密用品上。
成件事最有趣，就係由返呢件小發明嘅幾千年進化史。
依希臘神話，克里特島米諾斯王（King Minos）嘅精液「有蛇同蠍」，王后為求自保，就喺親熱時使用山羊膀胱呢個「物理屏障」，被視為避孕構想嘅最早源流。
歷史現實方面，公元前1000年嘅古埃及已用浸油亞麻布作防護；15世紀前嘅中國富貴户用油紙或羊腸包裹，而日本武士同富商用龜殼或牛角製「兜型」（Kabuto-gata）硬殼套，只覆蓋頭端，佩戴效果可想而知。
16世紀梅毒席捲歐洲，意大利解剖學家加布里埃爾·費洛皮奧（Gabriele Falloppio）喺1564年提出：將亞麻布浸藥水後裁成小布套，戴喺前端並用絲帶繫緊，其記錄中1,100名實驗對象冇人感染——係歐洲文獻中最早明確為「防疫」而設嘅物理屏障。
17、18世紀，羊腸、魚鰾反覆清洗、硫磺燻香製成，係歐洲貴族同英國軍隊嘅奢品；「Condom」呢個名據傳源於英王查理斯二世御醫「Dr. Condom」，卡薩諾瓦（Casanova）喺自傳稱之為「英國騎兵大衣」，每次「上陣」前會吹氣查漏。
19世紀工業革命改寫局勢：1839年固特異（Goodyear）發現硫化技術，1855年首個橡膠套面世（厚2毫米、有側縫），平民首次負擔得起；1920年代乳膠塗佈生產帶來無縫、超薄、即棄；1932年杜蕾斯（Durex）量產乳膠套，二戰成為軍隊標準配，1980年代AIDS風暴下乳膠套成為公衞防線。
姣姐講多句：安全套嘅進化史，正正係人類同慾望、疫病鬥智鬥勇嘅縮影。由埃及亞麻、意大利防疫布、英帝羊腸，到今日幾微米厚嘅工業乳膠——品控從來唔係「放寬」得嘅選項。施Sir嘅「放寬品控以振興生育」呢個奇想，同安全套幾百年來嘅使命剛好行成反方向。要振興生育，與其同一片薄乳膠計較，不如放寬兩性雙向嘅健康教育先算數。
黃姣姐整合｜頂硬上
