陳康堤與黃澤林認愛半年確認分手，日前黃澤林出戰廣州南沙挑戰賽奪亞軍，賽後一段與《夜王》Mandy譚旻萱甜錫嘅片段喺小紅書流傳，網民笑稱「無縫接軌」。
陳奕迅同徐濠縈嘅22歲女兒「包包」陳康堤，今年4月同香港網球一哥黃澤林認愛，放閃咗半年，近日已經親口證實分手。陳康堤低調講：「乜嘢具體原因都唔回應，我哋有共識，都係兩個人之間嘅事，畀啲空間我哋。」又坦承分手後情緒「會有啲低落」，但有父母支持。黃澤林則喺10月中直播時已承認回復單身，話專心打波。
真正引來熱話嘅，係日前廣州南沙《ATP CH75 廣州南沙挑戰賽》嘅一幕。黃澤林經過逾2小時苦戰，不敵澳洲籍3號種子特里斯坦·斯庫爾凱特（Tristan Schoolkate）奪亞軍。賽後一段喺小紅書流傳嘅影片，網民發現黃澤林身邊疑似已有新女伴同行，而呢位女伴，據網民話，正係有「籃球女神」之稱嘅時尚新星、《夜王》嘅Mandy譚旻萱。
據小紅書開po嘅網民，影片入面黃澤林完賽後，Mandy上前交談，黃澤林伸手摸咗Mandy臉、錫咗一啖，譚旻萱隨之甜笑。有網民喺文下笑稱「無縫接軌呀！」。
Mandy唔係素人：2020年簽咗經理人公司Cool Style Management，2023年同黃淑蔓（Feanna）、連家穎（Vian）組成女團Me&入行，拍過ViuTV《季前賽》、《夜王》等劇。佢2023年被爆同導演男友Christopher拍拖，一度話已認定對方係結婚對象，近年鮮再提及另一半。
陳康堤同黃澤林嘅緣分據傳經陳奕迅牽線，熱戀期間陳康堤同爸爸曾飛巴黎撐黃澤林打法網外圍賽。呢段戀情只維持咗半年。
姣姐講多句： 分手半年內身邊換人，呢個「無縫接軌」真係快過茶餐廳換桌。但重點係呢個「新歡」只係網民睇片睇出嚟，黃澤林本人一啲聲都冇，當八卦睇就得，實錘仲未出爐。
黃姣姐整合｜頂硬上
