10月7日，蔡楓華登上翁靜晶嘅網檔節目《危險人物2.0》，首度於鏡頭前罕有摘下太陽眼鏡，指住自己右眼，揭開2004年一段埋藏多年的事。兩人相隔40多年再聚首，翁靜晶聞言落淚。
蔡楓華自述，2004年佢想申請紅館開演唱會，因而得罪勢力人士，隨後喺深圳出關後遭約30人有組織圍毆：「佢哋有計劃、有組織、有預謀……一出返嚟，30幾人等我！喺深圳出面等我，喺深圳打我！」右眼更被「鐵蓮花」狠插，佢指：「大佬，用鐵蓮花插隻右眼，你知唔知？如果打低少少，我呢度爆咗！」經手術保住眼球後，右眼出現創傷性青光眼，視力永久受損，所以要長期戴太陽眼鏡。
被問到點解當時冇報警，蔡楓華苦笑：「你真係問嚟都多餘。」佢解釋，當年自己俾傳媒冠以「四大癲王」稱號，就算講出經歷都無人肯信，事後去信保安局，案件轉交警務處，檔案最終不了了之。佢話：「我話畀你聽，我唔理嗰個係乜乜大哥……我都要攞返個公道！」
佢同時澄清一直流傳嘅傳言：佢話自己真正事業低潮，並非因一句「一剎那光輝唔代表永恆」遭TVB封殺，而係唱片公司冇履行出碟配合五場演唱會嘅承諾，令1988年紅館演唱會泡湯；1986年甚至係佢收入最高嘅一年。佢亦透露，曾喺美國大西洋城表演時，被人以四支槍指住個頭，佢只説：「嗰次就唔係為咗錢……唔想講呢啲嘢喇。」
翁靜晶喺節目中為佢抱不平，更落淚承諾替佢翻案，蔡楓華則哽咽話：「我話俾你聽，最好唔好搞，連累咗你……呢班人惹唔過。」
姣姐講多句
呢單唔係單純八卦。一個歌手因為申請自己嘅演唱會檔期，被打到一隻眼永久受損；報警冇人理，喊冤冇人信，因為佢俾人貼咗「癲王」嘅標籤。而打佢嘅人，佢頭下仲要喊「惹唔過」。佢自己講：「社會地位太低，等於瞓街邊，俾人打你一身，邊個理你？」呢句先係真正傷人嘅嘢。
黃姣姐整合｜頂硬上
