近日「女裝防拆帶」衝上微博熱搜，起因係有買家喺內地網購平台買女裝，收貨後發現領口或肩縫縫住一條長2.4米嘅外露絲帶，上面寫住「拆除不退不換」。
呢樣嘢嘅出現，源於商家對「7日無理由退貨」機制嘅防範。9月30日有評論文章指出，部分商家怕買家著咗衫出街旅行或應酬，然後再原路退返。對佢哋嚟講，退返嚟嘅衫只要沾了妝品痕跡或有異味，就再冇辦法當全新貨賣，呢條帶就係佢哋嘅「看門口」。
不過最關鍵嘅問題係：防拆帶一剪，就真係冇得退？事實唔係咁簡單。「拆除不退不換」只係商家單方面寫嘅告示，唔好使照單全收。要分辨兩種情況：
7日無理由退貨：按內地有關網絡購物七日無理由退貨嘅規定，無理由退貨嘅貨品須保持完好。開箱查驗、為確認功能而做合理試身，唔算破壞商品；但若你着咗出街旅行再退返嚟，就屬於超出查驗範圍嘅使用，會影響退貨資格。商標吊牌被剪走、衣物沾污受損，同樣會被視為商品已唔完好。所以「7日無理由」絕對唔等於「著7日出街再當新貨退」。
貨品本身有質素問題：如果衫本身有車縫破損、拉鏈壞、布料有明顯瑕疵，就算防拆帶已經被剪斷，商家都必須依法承擔責任。《消費者權益保護法》第24條給予消費者就品質問題要求退貨、換新或修理嘅權利；第26條更明確禁止商家用不公平、唔合理嘅格式條款，剝奪消費者權利或撇清自身責任。一紙「不退不換」告示，喺法律面前係冇效力嘅。
呢招其實並唔係新發明。去年11月已有防拆吊牌喺網上大賣，有廠商銷量暴增10倍、售出近百萬個吊牌。有漢服店主曾直言退回衣物沾污嘅問題困擾佢哋，而買家則怨大字吊牌礙事，着衫脱衫都唔方便。商家同買家之間呢場「防拆攻防戰」，原來早已打了好耐。
姣姐講多句：一條2.4米嘅帶，寫住「拆咗就冇得退」，本身就係一齣荒誕劇。商家怕「免費租衫」，買家怕「食暗虧」，雙方互防到要喺件衫度釘條帶，先見網購信任之稀薄。買家收貨要記得：保留吊牌同防拆帶，逐件檢查尺碼、布料、車縫同拉鏈；發現瑕疵即拍照記錄，要試身就問客服並留對話。跨境網購仲要留意平台嘅跨境退貨期限同運費安排。
黃姣姐整合｜頂硬上
