TVB台慶劇《璀璨之城》近日熱播，陳瀅喺劇中突破尺度嘅「腿張開」戲份先至討論到勁，未幾佢適逢37歲生日，喺社交平台連發慶生靚相，手捧一大束由神秘人送嘅艷紅玫瑰，蛋糕前閉目許願，配文「made a hot wish」。
一發出，呢束「極具分量」嘅紅玫瑰即刻點燃大批網民好奇圍觀，留言急問送花嘅究竟係何方神聖，有冇就係早前同佢互稱「老公老婆」嗰個圈外男友Howie。
姣姐講多句，港娛圈呢種「生日神秘人送大花」劇本真係幾 decades 都未更新過：女藝人出鏡靚相＋巨型花束＋一個「？」，三件套一齊就齊晒，網民自動進入「偵探模式」。
翻查陳瀅感情史，佢唯一公開承認過嘅戀愛係2015年與何鴻燊四房兒何猷亨外遊後大方認愛，一度深受梁安琪歡心、被外界視為有望嫁入豪門，惟戀情維持不足一年即告分手，之後雙方退回朋友；2020年何鴻燊喪禮上到場致哀更一度被聯想「復合」，陳瀅最終強調只係好友。
此後陳瀅緋聞名單包括方力申、羅天宇、陳家樂及温家偉，而近年傳得最勁嘅係同周嘉洛因合作《痞子殿下》傳出姊弟戀，周更曾被拍到駕車直入陳家疑通宵留宿惹來同居疑雲，兩人其後一直否認，堅稱純屬好友。
今年初，陳瀅又傳出與圈外男友Howie喺社交平台互稱「老公老婆」，甚至同場睇BLACKPINK演唱會，互動親暱。
對於今次收花再爆新戀情，陳瀅早前宣傳《璀璨之城》時已曾笑言今年決定「躺平」過生日：「暫時得一個圈外男性朋友約咗我食飯，你哋成日話『老公』嗰個，我哋真係好好朋友！我而家冇追求者，都未拍拖點結婚啊？一步一步嚟喇。」
講得好有水平，但呢束花就話冇聽過。
黃姣姐整合｜頂硬上
