拍拖最恐怖嘅係咩？唔係吵嘴，係佢一熟睡你就聞到「屍臭味」。
有台灣女生喺 Dcard 發文，話男友清醒時口腔一截都冇味，但一閤埋眼，「嘴巴跟呼吸就會開始散發超級噁心的屍臭味，完全是那種老鼠死掉的屍臭，而且離一段距離都能聞到」。刷牙、用夜間專用漱口水都無用，佢就係夜夜被惡臭燻醒。帖文 2024 年 12 月發出，近日再次被炒熱，同樣惹來一翻討論。
樓主喺帖文交代男友「日夜顛倒、不曬太陽、不太活動、愛吃辛辣、腎臟生病過、長過腫瘤」，仲話男友睇過牙科、有定期體檢，「目前是排除掉口腔清潔的問題」。
點解口臭只喺熟睡時爆發？文章指一個可能性好大嘅元兇係扁桃腺結石——食物殘渣、死皮細胞同細菌喺扁桃腺隱窩堆積鈣化。成日張口呼吸、扯鼻鼾，唾液分泌一少，結石發酵嘅揮發性硫化物就大量湧出。衞生防護中心都提過，唾液不足令口腔乾涸，係口臭核心成因之一。
要再恐怖啲，夜間「屍臭」背後可能係全身性疾病：慢性鼻竇炎、胃酸倒流，甚至晚期肝腎病變。若呼出氣味帶強氨水味，醫學上叫「尿毒性口臭」，就係要提防慢性腎衰竭。
所以仲想「撒糯米避邪」，不如帶佢去睇醫生，自查 4 個徵兆：1）睡眠是否張口呼吸；2）有冇慢性胃酸逆流；3）單側鼻塞、耳鳴、鼻涕帶血絲，提防鼻咽部腫瘤；4）長期疲倦、黃疸、小便濃茶色，即刻抽血查肝腎。有扁桃腺結石可揾醫生門診清除，切勿自己用硬物挖，搞到感染咗就麻煩。
姣姐講多句：拍拖拍落去，真係有時要「用鼻聞」啲——但聞到嘢唔好自己嚇自己，最啱就係盡早就醫，唔好同「屍臭味」講情。
