有女網友喺 Dcard 呻，話同男友準備出國旅遊，訂機票嗰陣男友問佢想唔想一齊升商務艙，佢嫌短程機程唔值得花呢筆錢，當即拒絕。原PO 以為男友會理解，會陪佢一齊坐經濟艙，點知最後男友自己升咗，獨留佢一個喺經濟艙。
原PO 坦言呢次令佢「心灰意冷」，原因唔係坐唔到商務艙，而係覺得「距離被拉開……被放在次要位置」。佢話若角色互換，佢會陪男友坐經濟艙，點知男友明知佢對價錢猶豫，仲選自己升，令佢質疑：「我在他心裡是不是沒有想像中重要？」
帖一出，回覆區淨係一片「你太過分」，有女網友指「都問過妳了，就這點事也要內心掉了一塊」，又話「奇怪人家也有付錢為什麼要跟著妳一起，你們金錢觀就不一樣」。
更多回覆指出兩人心底有更深層分歧：「妳想的是理所當然的犧牲，他想的是不虧待自己，你們其實根本不在同一個維度思考」。有人更直接，「看下來你們光價值觀就不一樣了，還有什麼好探討的……分手也只是遲早的事」。
姣姐講多句：呢單事最耐人尋味唔係「坐邊排」，而係點解成個討論區齊齊倒向男方。原PO 嗰句「他是不是不重視我」，啲人聽入耳就係「要求對方犧牲」，但其實呢次根本冇人犧牲咩——男友問過、原PO 拒絕過、最後決定權喺佢自己。真正問題係兩邊對「付錢」同「被照顧」嘅定義完全唔同一個語系。網民一面倒挺男方，唔係因為佢哋偏心，係因為呢單事表面係「座位」，本質係「兩套價值觀嘅對撞」，而價值觀對撞，講真，坐邊排都冇用。
