上個月《夫妻肺片》錄映，林盛斌（阿Bob）一聽記者提「張致恒」三字，即刻苦笑喊：「喂呀！唔好問佢！好驚你問呢啲嘢呀！」——呢個被外界列入「四大債主」之一嘅阿Bob，今次罕有動氣，開聲爆料。
佢話同張致恒（Steven）喺電台時期認識，有一陣好close，會到對面屋企打麻雀。佢指 Steven 近期受訪，揚言要努力洗底、建立「好爸爸」形象，仲話會「還少少俾唔同嘅朋友」。但阿Bob一句道破：「一個仙都冇還過！」過去5年佢屢借屢借，反而又借出幾次，期間更被 Steven 以「小朋友奶粉、尿片冇錢買」為由成功科水。
「佢知我啲數冇其他人咁大，佢知道用小朋友可以打動我，」阿Bob 直認被對方拿捏，「佢講到好陰公，連阿Sa都當係俾小朋友利是，我都係一樣咁感覺。」佢自嘲：「我都覺得自己戇居！但係真心當佢係一個朋友先咁做。」佢話 Steven 承諾返多次會還，佢就選信任，但今次正式「無啦，無意思啦！」
最搞笑係 Steven 喺社交平台屢次「告急」叫窮，甚至貼出收款 QR Code 向網民眾籌，全港圍剿。阿Bob 話 Steven 日前仲私訊返佢想再借，佢即刻收水。佢話 Steven 有得還就「好高興同樂意」，但建議對方出去做兩三份 part time，自力更生。
姣姐講多句：一個「好爸爸」喺鏡頭前講要「有擔當」，背地裡靠 QR Code 向全港科水；另一個老友喺鏡頭前自嘲「我戇居」，5年科水科到破產。邊個先係真嘅「有擔當」？我想問張致恒：你條街數點還？靠貼 QR Code？我話你啊，真係要揾份正職打兩份工啦，唔好再靠「細路奶粉」開口科啦，佢哋已經唔細喇，應該唔使奶粉尿片啦。
黃姣姐整合｜頂硬上
