AI短劇「不燒心文學」近幾日喺中國內地網絡爆紅。10月9日中國科學技術協會微信公眾號「科普中國」、新媒體平台「新榜」及東南網同日出文，指呢批高度模板化嘅AI短劇，將「不燒心」呢個詞徹底帶紅，抖音相關話題瀏覽量已經突破13.7億次。
呢類短劇嘅套路固定到令人驚嘆：主角堅持用好食材做包子、飯盒、豬腳飯，貴少少但顧客吃得安心；對手開低價用差食材搶客，結果客人都走返主角門口，一句「貴是貴了點，但吃了不燒心」收結。經典台詞仲有「先把規矩立住，路才能越走越寬」、「寧可少掙點，也不能壞了規矩」，甚至有「剩下怎麼辦？倒掉」咁狠。
隨住短劇瘋傳，「不燒心」已經擴散到食品以外，變成網民評商品、服務、交朋識友嘅通用詞。不過最抵玩嘅，係「新榜」點破：呢套「堅持品質、顧客嫌貴、同行內捲、顧客回頭」嘅劇本，竟被原封不動複製去納鞋底、編假髮網等行業。同一套主線，換個行頭就再播。
姣姐講多句，呢啲劇成日教訓黑心商家唔好偷工減料，但成批AI劇自己就係流水線，換湯不換藥，同片中「劣質原料賺快錢」真係無分別。觀眾看一兩部新鮮，看多自然審美疲勞，不如玩返梗反嚟調侃。東南網喺10月9日評論就講，呢熱梗表面係玩「不燒心」，底層其實係普通人「可以不完美，但不要欺騙」嘅訴求。
順帶一提數據：中國微短劇用户已超8億人，今年前8月上線微短劇達43萬部，其中AI劇佔比過九成。成個千億市場被大量流水線產品塞滿，劣幣驅逐良幣，消耗就係觀眾對呢行嘅最後耐性。
呢次唔係「不燒心」梗嘅問題，係成個行業都要「不燒心」自己，唔好再整到觀眾真燒腦。
黃姣姐整合｜頂硬上
