兩個AI，同一顆腦、同一份才華、同一份工，唯一分別係一個長男聲，一個長女聲。結果？男版掙多約10%。

呢次係蘇黎世大學、利默里克大學同SKEMA商學院嘅研究。189名工友戴上VR頭戴式裝置，扮做一間叫HARCOM嘅虛構公司員工，同AI助手合作搞創意。助手有兩個版本：Johan（男形象男聲）同Johanna（女形象女聲），後台同一個GPT-4早期版本。每位參與者會跟文本chatbot、桌面機械人，再加其中一個「人樣」avatar合作。

做完任務後，參與者可以分最多4瑞士法郎（約5美元）俾AI作獎金，唔分嘅自己收落袋。

數字出爐：Johan平均攞2.96瑞士法郎，Johanna只攞2.54。男版仲被評為「更像人」，7分制下5.09對4.59。

最犀利嘅部分喺後。研究人員喺實驗後訪問34名參與者，30名話會「不分性別、平等評價同獎勵」AI。錢錢分配話唔同。

合著者Thomas Fritz喺蘇黎世大學訪問指，呢個差距反映一種「無意識盲點」——人真誠相信性別唔關事，卻唔見社會線索點樣影響自己決定。

合作者Dr Mary Hausfeld話：「人哋常覺得AI中立，但我們設計同呈現呢啲系統嘅方式，會激活呢啲系統同我們對人之間嘅假設同偏見。」

姣姐講多句：AI有男版女版價，你哋睇埋未。重點唔係AI偏見，係人哋自己分男仔女仔價，仲以為自己公平。想個AI幫你寫code，佢長男聲仲多收你10%——呢個係AI時代最真實嘅「同工不同酬」。

黃姣姐整合｜頂硬上