10月6日，美國航空（American Airlines）編號AA37嘅波音777，喺當地時間上午11時10分由西班牙馬德里起飛，目標德州達拉斯，載緊287人，航程10個鐘。飛咗約7小時16分鐘、接近抵達時，機師發現全機8間洗手間有6間作死，只剩兩間仲頂硬。客機轉飛紐約甘迺迪機場，喺美國時間下午12時27分降落；維修近3個半小時後，下午3時56分再飛達拉斯，較原定時間遲咗4個鐘落地。
最銷魂係接近紐約嗰段。機師向控制塔講：「我哋只有兩個廁所可運作。」對頭控制塔都嚇到答：「你話只有兩個廁所，對嗎？」呢段對白，堪稱航空界罕見「直球對決」。
客機當時仲剩夠飛超過4個鐘嘅燃油，降落重量超標，機師遂以國際緊急用語「pan-pan」通報（即「要即時處理、但未至危及生命」），避免煞車過熱風險。最終安全落地。
硬蕉抽兩句
287人，2間洗手間，即係一間坐度供超過140人使用。呢個「共享」密度，連共享單車都冇共享到咁狠。航空公司慣常比例係每50人一廁，今日直接變成「一廁頂五廁」。乘客呢個鐘「忍氣吞聲」，真正係忍到硬，忍到頂硬。
