李秀滿一手打造嘅新女團 A2O LITE，10月12日喺京畿道高陽市 KINTEX 同男團 A2O SOUL 一齊做聯合出道 Showcase，活動才剛落幕，爭議就接踵而至。

團內最細嗰個——年僅13歲嘅忙內艾敬——憑出色舞技喺台上成為全場焦點，有網民甚至將佢嘅舞台表現聯想到寶兒出道初期嘅模樣，話題度迅速上升。但就喺呢陣，中國網絡社群開始流傳佢父母經營嘅公司涉嫌積欠員工薪資。

喺北京嗰間教育公司，艾敬嘅媽媽擔任法人代表、爸爸擔任監事。據前員工指控，公司由2024年起已開始拖欠工資；雙方經過勞動仲裁並達成分期償還協議，但公司只履行咗3個月，之後就再度逾期。再查企業資訊平台，該公司及艾敬父母名下另有2起法院強制執行案件，金額合計約345萬人民幣，不過有冇全部同欠薪有關，相關細節仍未釐清。

10月14日，自稱係艾敬媽媽嘅帳號喺微博發聲明。佢稱過去經營教育相關事業，公司經營狀況突然急轉直下、陷入財務困境，進而引發債務糾紛，對事件造成嘅困擾「深感抱歉」，並表示「會堅守責任，直至問題全部解決，負責到底」，目前正逐一聯繫相關人士、協商解決，承諾問題解決前「絕不逃避責任」。

不過涉及女兒，佢就明確劃線：事件應由父母出面承擔並處理，艾敬同自己過去經營嘅事業及相關糾紛「完全沒有關係」，希望外界唔好將責任轉嫁到孩子身上。

姣姐講多句：一個13歲嘅女團成員，因為父母喺北京開教培公司嘅財務風波，就喺舞台之外被拖落網上熱議，呢個唔係佢選嘅位置，都唔係佢承擔嘅帳。媽媽聲明嘅重點其實好清晰——父母嘅事父母負責，唔好攤在子女身上。呢單事涉及未成年人，唔係可以拿嚟當笑料嘅話題；關注嘅核心應該係拖欠薪職嘅員工能否真正收返欠薪，而唔係將鏡頭對準一個剛出道嘅13歲少女。

黃姣姐整合｜頂硬上