呢單「見網友」事件，唔好笑得出聲，但值得每個時常網約拍拖嘅港人認真睇一遍。
據泰國旅遊警察披露，1名24歲中國籍女子早前喺社交平台結識一名自稱身在泰國嘅男子，在對方甜言蜜語嘅邀約下，於9月28日獨自飛到曼谷素萬那普國際機場。
下機之後，一名聲稱受男網友委託嘅接機人員將她安排坐上私家車。女子上車後未夠10分鐘，隨身行李同手機即遭強行奪走，更被車內多人貼身看守。車輛隨即駛離曼谷，朝北連夜趕往泰緬邊境。
資料圖片：Pixabay
當車行至泰國北部南奔府黎縣，女子趁看守人員不備，喺車輛仍在行駛中果斷拉門跳下，受傷倒卧路邊，幸被途經嘅當地居民即時發現，送院救治。
調查發現，該犯罪網絡熟悉達府邊境嘅偏僻小路，長途押送中更多次換車以避查緝。其後警方於達府湄拉瑪縣同清邁府堆沙革縣拘捕2名涉案泰籍男子。其中一名被捕司機供稱，農閒時受僱為非法轉運接載人員，每成功運送一次可獲約5,000至15,000泰銖（約1,168至3,504港元）酬勞。泰媒透露，案件幕後疑由中國籍主腦操盤，原本擬將女子運至邊境後向其家屬勒索贖金。
泰國警方指出，呢單係過去兩個月內第二宗同類案件，今年8月已有另一宗手法雷同嘅事件，受害人亦係在押送途中跳車脱險。中國駐泰大使館亦已就近期同類案件發出安全預警。
姣姐講多句：「見網友」本身唔錯，但涉及赴外地單獨相會、由對方安排交通接載，風險係真實存在。呢單唔係八卦花生，而係真實在人身上發生嘅事，港人網約拍拖前，多方查證、告知家人，唔係多餘。
